Nagdangat sa kapin P1 ka milyon ang balor sang mga relo, alahas kag kwarta nga nataban sang mga kawatan nga nagsulod sa balay ni anay Cadiz City Councilor Ray Yee sa Purok Yee-on, Barangay Cabahug, sang nasambit nga syudad.
Santo sa police report, nagluntad ang insidente sang Sabado, Abril 1.
Nakuha sang mga kawatan ang 14 ka relo nga may kabug-usan nga balor nga P289,000, lima ka bracelet nga balor P160,000, mga alahas nga balor P150,000, 35 ka mga kulintas nga balor P270,000, bag nga tag-P9,500 kag cash nga P285,000.
Nalakip man sa mga nakawat ang personal nga kagamitan sang anay konsehal kaangay sang passport, travel documents, nagkalain-lain nga mga ID, visa, passbook kag seaman’s book sini.
Sa inisyal nga imbestigasyon, nagsulod ang mga kawatan sa likod nga bahin sang balay sang biktima paagi sa pagkakas sang mga jalousie sa bintana.
Nagapadayon ang imbestigasyon ilabi na sa identity sang mga suspek.
