Nagadangat sa kapin isa ka milyon ka pesos ang ginkawat gikan sa isa ka gasolinahan sa Barangay Alijis, Bacolod City kahapon sang kaagahon.
Suno kay P/Capt Elmer Bonilla, station commander sa Bacolod Police Station 7, ginalantaw sang mga ini ang posibilidad nga inside job ang natabo nga pagpangawat.
Natabo ang pagpangawat pasado alas-12:00 sang kaagahon kun sa diin ang mga pump boy nga didto na nagatinir sa gasoline station ang naggwa agud magpanyapon.
Sa pagbalik sang mga trabahante, bukas na ang piyertahan sang opisina kun sa diin yara ang vault nga ginasudlan sang kita sang gasolinahan.
Didto naman natukiban sang mga ini nga ginrungkab na ang vault kag gintaban ang kita sang gasolinahan sa sulod sang tatlo ka adlaw nga kapin P1 million.
Gilayon naman sang mga ini nga gintawgan ang operation manager agud nga ipahibalo ang insidente kag matsektyar ang CCTV footage.
Santo sa CCTV footage nga narecover sa wala na ginhingadlan nga gasolinahan, nga apat ka mga persona ang nagsulod sa opisina kag nagpangawat.
Kun sa diin isa diri ang ila nga nakilala nga trabahante man sa iban nga branch sang kompanya.
Suno kay Bonilla, ginapreparar na nila ang mga dokumento agud nga makafile sang kaso batok sa persona nga nakilal-an.
Nagpatigayon naman ang mga ini sang hot pursuit operation apang tubtob sa karun wala pa makit-an ang gintumod nga isa sa mga kawatan.
Suno kay Bonilla kaso nga robbery ang mahimo pangatubangon sang nasambit nga suspetsado kag sang tatlo pa sini ka kaupod.
