Kadungan sa ika-68 nga kaadlawan ni President Ferdinand “Bongbong” Marcos Jr. nagpatigayon sang “Handog ng Pangulo: Serbisyong Sapat Para sa Lahat” program sa Negros Occidental Provincial Capitol kun sa diin kapin P100 million ang interventions nga ginpanghatag.
Sa interview sang Bombo Radyo Bacolod kay Department of Agriculture – Negros Island Region Executive Director Engr. Jose Albert Barrogo, lakip sa interventions nga ginhatag amo ang agricultural machineries, binhi, abono, livestocks kag mga package program.
Apang isa sa nangin highlight amo ang pagbaligya sang 300 ka sako sang P20 per kilo nga bugas sa inisyatibo sang National Food Authority kag Food Terminal Incorporated.
Sila ang nagbaligya sang maximum nga 10 ka kilo sang bugas, para sa tanan nga sektor.
Nagabaligya man ang Negros Occidental Provincial Government, apang ang sa probinsya ang nakaspecify sa senior citizen kag persons with disability (PWD) sector.
Aminado si Barrogo nga may mga farmers nga naga-ibwal bangod sa pagbaligya sang P20 per kilo nga bigas samtang tuman naman ka barato sang pagpamakal sang humay.
Pasalig sini nga ang problema ang ginapangitaan nila sang solusyon.
Samtang sa programa nagpanghatag man sila sang binhi sang mais, nagpanghatag sang livestocks kag poultry commodities kag isa ka unit sang 4-wheel drive tractor.
Luwas diri, yara man sa aktibidad si Technical Education And Skills Development Authority (TESDA) Director-General Jose Francisco “Kiko” Benitez, nga nagturn-over sang P2 million nga allowances sa 878 TESDA scholars.
Samtang si Negros Occidental Governor Eugenio Jose “Bong” Lacson ang nagturn-over man sang financial assistance sa 130 ka distrissed overseas Filipino workers (OFWs).
Suno kay Barrogo, may natalana man nga distribution sang tractors kag rice harvesters sa Setyembre 18 sa Bago City.
Pasalig sini nga wala naga-untat ang pagpangita sang solusyon ni Presidente Marcos kag DA Secretary Francisco Tiu Laurel Jr. sang solusyon sa mga problema sa sektor sang agrikultura.
