P450,000 nga balor sang illegal nga droga ang nakumpiskar sa buybust operations nga ginpatigayon sang Kabankalan City Police Station kag Philippine Drug Enforcement Agency (PDEA) 6 sa Sto. Niño, Brgy. Camugao, Ilog-Hilabangan River, Kabankalan City kahapon sang aga.
Sa interview sang Bombo Radyo kay Police Lt. Colonel Jonel Guadalupe, ginkilala ang mga suspetsado sanday Marialyn Tabujara, 39 anyos, residente sang Brgy. Binikil, Kabankalan kag ginakabig nga high value target kag Eric Razonable, 37 anyos kag residente sang Villa Sta. Maria Phase 2, Lot 7, Binalbagan.
Suno kay Guadalupe, sang mahibaluan ni Tabujara nga isa ka pulis ang nagbakal sa ila, gilayon ang mga ini nga nagsakay sa pick-up kag naghana nga malagyo apang bangud may nakapalibot na nga mga pulis sa area, nadakpan ang mga ini.
Nakuha sa ila paghinakop ang 12 ka heat sealed transparent sachet sang suspected shabu, isa ka brown nga coin purse, isa ka improvised plastic straw, duha ka unit sang cellphone, P1456 cash proceeds kag isa ka Nissan Navarra nga pick-up.
Ang mga suspetsado kag mga nakompiskar ang yara sa karun sa kustodiya sang Kabankalan City Police Station nga nakatalana nga pasakaan sang kaso nga pagbayolar sa R.A 9165 ukon Comprehensive Dangerous Drugs Act of 2002.
