Ginabanta kapin P9 million nga balor sang alahas nga nasulod sa vault sang jewelry store sa sulod sang Gaisano Mall sa Silay City, Negros Occidental ang nakuha matapos nga ini ang ginsulod sang mga kawatan kahapon sang kaagahon.
Sa interview sang Bombo Radyo Bacolod kay Police Lt. Col. Mark Anthony Darroca, Chief of Police sang Silay City Police Station, sa inisyal nga imbestigasyon, tatlo ang mga kawatan kun sa diin ang mga ini ang wala sa gihapon makilal-an.
Suno kay Darroca ang mga suspek ang nag-agi sa bahin sang grocery store sang nasambit nga mall matapos nga ginbuhuan nila ang concrete nga ding ding kag naglusot sa grocery store.
Suno sa hepe, ginvolt cutter pa sang mga suspek ang roll up door kag ginpunterya ang mga alahas nga nakabutang sa estante.
Suno kay Darroca, ginapainventory pa sini sa imbestigador ang posible nga balor sang nadula nga mga kagamitan agud matally sa una nga gindeklarar sang attendant nga P9 million kag masiguro man nga indi man masobrahan ang gindeklarar nga amount kasubong man may reference sa figure nga gindeclare.
Wala naman sang iban nga ginkawat sa mall kag tuman pa katemprano ang paghambal nga ini ang inside job bangud nagapadayon pa ang imbestigasyon kag interrogation sang posible nga persons of interests.
Suno kay Darroca, nagpatigayon man sila sang interview sa mga utilities kag mga gwardya sang mall samtang nagluntad ang insidente, alas 1:14 am santo man sa nakita sa CCTV footage.
Indi pa man mahibaluan sa karun kun isa bala ka grupo ang nagpangawat sa nasambit nga mall apang nakacoordinate na ang hepe sa intel units ilabi na sa Bacolod City Police Office kag sa regional headquarters sa pagmonitor ukon makakuha man sang clue kun sin-o nga grupo ang nagsulod kag nagpangawat sa mall.
May nakuha naman nga CCTV footage ang mga kapulisan kag ginatumod nalang kun sin-o ang duha nga nagsulod agud magpangawat.
