Preparado na ang provincial government sang Negros Occidental para sa selebrasyon sang ika-121 nga Al Cinco de Noviembre ukon Negros Day ukon ang pagsungka sang Spanish forces sa mga Negrosanon sang 1898.
Suno kay Engr. Jojo Amugod, ang Panaad Park and Stadium Administrator, may yara sang ginpreparar nga programa sa Provincial Capitol Lagoon sa Noviembre 5 agud dumdumon ang madinalag-on nga paglutos sang mga Negrense batok sa pwersa sang mga Espanyol sa pagpamuno nanday General Juan Araneta kag General Aniceto Lacson kun sa diin ila natiplang ang mga mananakop sa gingamit nga ginpintahan nga mga ginlukot nga amakan kag ginhimo nga replika sang canyon.
Kabahin sang aktibidad sa Martes sang aga ang wreath laying activity kag paghatag sang P100,000 nga cash incentives sa 33 ka mga centenarians sa probinsiya.
Magluwas diri may patigayunon man nga 42 kilometers relay nga may tatlo ka kategorya.// Ini ang ginalakipan sang Open Category, Under 19 kag Executive Category kun sa diin tagsa ka team ang may napulo ka miembro, nga may 7 ka lalaki kag 3 ka babayi.
Magasugod ang relay sa Capitol Lagoon padulong sa banwa sang EB Magalona kag magabalik.
Pasidunggan sang provincial government ang mga Negrense nga nagmadinalag-on sa tagsa nila ka larangan sa selebrasyon sang Al Cinco de Noviembre sini nga Martes.
Suno kay Engr. Jojo Amugod, Panaad Park and Stadium Administrator, lima ka mga Negrense ang hatagan pagkilala sa Social Hall sang Capitol, Martes sang gab-i.
Ang mga awardees ang ginkilala nga sanday Rodolfo Reveche para sa Cultural and Arts Promotion for Community Development; Antonio Jesus Orbida sang Binalbagan sa Organic Farming; Charly Co para sa Visual Arts kag Chef Fernando Aracama para sa Culinary Tourism.
Hatagan man pagkilala si Department of Foreign Affairs (DFA) Secretary Teodoro Locsin Jr. para sa Public Service.
