Nagahingyo ang provincial administrator sang Negros Occidental sang pag-intindi sa mga locally stranded individuals nga indi pa makapauli bangud puno pa ang mga quarantine facility sang probinsya.
Sa interview sang Bombo Radyo kay Atty. Rayfrando Diaz, ginpahayag sini nga puno na naman ang mga quarantine facilities bangud sa 1,500 ka mga LSIs nga nagpauli sang Hulyo 17 tubtob Hulyo 19.
Suno kay Diaz, bisan ang mga local government units ang nagapangayo naman sang bulig sa probinsya bangud wala naman sila sang butangan sang mga LSI gani madamo sa mga ini ang ginpangsaylo sa Silay Healing Center.
Suno sa iya, kuntani intindihon anay ang sitwasyon sang quarantine facilities kag dapat ibase sa kapasidad sini ang pagpasulod sang mga LSI.
Suno sa provincial administrator, amu man ini ang rason kun ngaa ginpaiway anay ang pagpasakay sa mga LSI sa barko.
Suno kay Diaz, ila anay icalibrate sa sulod sang duha tubtob tatlo ka adlaw kun pila ang bakante sa mga pasilidad kag ila ini ipahibalo sa national IATF bangud amu lang ini ang numero nga pasudlon.
Nagpanawagan man ini nga kun indi taga-Negros Occidental, indi anay magkadto sa probinsya kag magbyahe lang kun kinahanglanon gid.
