24 oras nga nagabantay ang mga kapulisan sa ciudad sang Bacolod ang North Capitol Road, Bacolod City kun sa diin nahamtang ang mga stalls nga ginabaligyaan sang mga nakigbahin sa 17th Negros Island Farmers Organic Festival.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, ginapabantayan sa mga kapulisan ang mga stalls 24 oras agud nga malikawan ang mga pagpangawat.
Suno kay Tolentino, ang una nga duha ka adlaw ang nagapabilin nga matawhay bangud wala man ini sang nakita nga may nagabaligya sang makahulubog nga ilimnon.
Suno diri, nagalaom siya nga tubtob sa matapos ang organic festival nga mangin malinong kag matawhay lamang ini.
Magluwas sa mga kapulisan may yara sang mga force multipliers nga nagabantay sa mga stalls agud nga magsiguro nga wala sang makawatan ilabi na kun nagapahuway na ang mga ini.
Dugang pa sini nga indi man gid tuman kadamo ang nagakadto sa organic festival apang ginalantaw nga sa Biyernes kag Sabado magadagsa na ang mga tawo bangud nga weekends.
