Ginapakamaayo sang Punong Barangay sang Barangay Singcang-Airport, Bacolod City nga nadakpan ang duha ka durugista nga nagadagdag sang dako nga volume sang shabu sa ciudad sang Bacolod.
Nahibaluan nga nadakpan kagab-i sa Purok Mars, Barangay Singcang-Airport sanday George Jayme Jr., 49 anyos, single, wala sang trabaho kag residente sa Burgos Street, Zone 5, Poblacion sa banwa sang Murcia; kasubong man si Dharryl Escanuela, 41 anyos, single, wala sang trabaho, tumandok sang Olongapo City, Zambales, apang temporaryo nga nagapuyo sa Royal Amri Hotel, 13th Street, Barangay 7, Bacolod City.
Sa interview sang Bombo Radyo Bacolod kay Punong Barangay Atty. Ceasar Distrito, padayun ang ila nga pagregister sang mga boarders kag temporary residents sa ila Barangay matapos ang asod-asod nga mga dalagkuan nga buybust operation sang tinalikdan nga tuig.
Kun sa diin ang mga Purok President ang nagapamalay-balay agud marecord ang tanan nga pangayaw, apang aminado ini nga madamo sang lulutsan pasulod sa Barangay Singcang Airport.
Pahayag ni Distrito nga sang damlag lang, maiwat naman ang mga buybust operations sa Barangay.
May ginpatukod man ini nga mga Tanod Outpost sa mga lugar nga madata ang illegal nga transaksyon.
Ginadayaw sini ang lihok sang mga kapulisan bangod madamo sang maguba ang kabuhi kag pamilya sa kadakuon sang volume sang suspected shabu nga narecover.
Paathag sang Punong Barangay nga kun may matumod nga persona nga durugista, siya mismo ang nagapadulong agud laygayan ini sang epekto sa iya kabuhi kag pamilya, samtang ginareport man sini kag ginatanyag sa mga kapulisan ang pagpatigayon sang buybust sa mga matumod nga drug personalities.
