Isa lamang ka persons of interest ang ginalantaw sang mga kapulisan sang Bacolod City Police Office nga naghimo sang pagpanaban sang taxi sa ciudad sang Bacolod.
Sa interview sang Bombo Radyo Bacolod kay BCPO Director Police Col. Eugene Rebadomia, ang modus sang suspek amo nga magasakay sa taxi kag kun makita nga may yara ini sang mapuslan sa mga pagkabutag sang driver kaangay sang kwarta, mapakuno-kuno ini nga may ipahapit.
Kaangay lamang sang isa ka ginreport nga nagsakay kag nagpapundo sa atubang sang Bacolod Police Station 1 sa Bacolod City Public Plaza kag ginlihog ang driver nga may idul-ong sa ibabaw sang police station.
Nagpati man ang driver kag ginbilin nga nagaandar ang taxi, gani natigayon nga mataban sang suspek.
Ang taxi narecover sa bahin sang Bacolod Police Station 4.
Sang Marso 10, may ara man sang kaangay nga hitabo kun sa diin ang pasahero ang nagpadulog sa Spa Lagoon, sakop sang Brgy 7, Bacolod City kag ginlihog ang driver nga magkuha sang laptop sa establishimento.
Apang wala man sang empleyado nga ginmensyonar nga kuhaan, kag sa pagbalik, wala na ang taxi.
Ang taxi ang narecover naman sa Brgy Mandalagan.
Panawagan ni Rebadomia, mangin aware sa palibot kag indi gid gilayon magsalig agud nga indi mabiktima sang kawatan.
Isa lang ang person of interest nga ginalantaw sang mga kapulisan sa duha ka reported nga insidente sang pagpanaban sang taxi bangud pareho ang ginhimo nga modus.
