Ginapakamaayo sang chairperson sang Committee on Tourism sa Bacolod City Council nga nangin hugot ang seguridad sa ginpatigayon nga concert sa Bacolod City Government Center kagab-i.
Sa interview sang Bombo Radyo Bacolod kay Councilor Jason Villarosa, first time nga tuman ka damo sang mga festival goers nga nagpadulong sa aktibidad antes ang Masskara Festival highlight.
Kagab-i, nagapanguna nga gindugok sang mga bisita ang performance sang Pinoy Boyband nga SB19.
Nakigkita naman ini kay Bacolod City Police Office (BCPO) Director Police Col. Joeresty Coronica nga iya nga gindayaw sa effort agud mapabilin ang kalinong kag katawhayan sa palibot sang festival site.
Personal nga nakita ni Villarosa ang mga police personnel nga nakastandby sa kada corner kag may-ara man sang nagalibot.
Samtang alas-6:00 subong nga gab-i, balantayan naman ang coronation night sang mga kandidata sa Miss Bacolod Masskara 2024 sa Bacolod La Salle Coliseum.
Kag bwas, liwat naman nga lauman ang pagdugok sang mga festival goers sa BCGC sa pagbisita sang pila ka mga sikat nga celebrities kaangay nanday Piolo Pascual, Moira Dela Torre kag magabalik si TJ Monterde upod sa iya asawa nga si KZ Tandingan.
Pasalig ni Villarosa nga madamo pa sang napreparar nga programa ang Bacolod Yuhum Foundation para sa masunod nga semana.
Sa karun ang mga Barangay nga magapartisipar sa Street Dance and Arena competition kag Electric Masskara ang preparado naman sa pagperform.
