May gindeploy ang Bacolod City Police Office nga police personnel nga magpabilin sang police visibility Apolinario Mabini Elementary School kun sa diin temporaryo nga nagatinir ang mga fire victims.
Sa interview sang Bombo Radyo Bacolod kay Police Col. Joeresty Coronica, nagcoordinar na sila sa Department of Social Services and Development (DSSD) kag nagdeploy sang police personnel agud nga makaresponder gilayon sa tion nga may magpanawag sa tion nga may kinahanglan.
Gintugyan man sini sa station commander sang Bacolod Police Station 6 ang pagcoordinate sa DSSD sa ginapatuman nga mga pagsulundan sa evacuation center agud mahibaluan kun ano pa ang ila mahimo sa pagpaayo pa sang seguridad.
Samtang, ginpahayag naman ni Nida Lopez, isa sa mga nasunugan nagapasalamat ini sa mga nagpadangat sang bulig para sa ila nga mga nasunugan.
Suno kay Lopez, madamo man ang nagpadala sang mga pamahaw para sa ila.
Nangin emosyonal man ini bangud sa natabo nga sunog.
Ginpahayag man ni Lopez nga kun siya lang ang indi na magbalik sa Barangay 27 kag kun mahatagan ini sang masayluhan.
Aminado man ang camp manager sang mga nasunugan sa Barangay 27 nga crowded pa ang Apolinario Mabini Elementary School ginatiniran sang mga fire victims.
Suno kay Wendy Ramos, Department of Social Services and Development (DSSD) personnel, magin-ot gid man ang lugar bangud ang pila sa mga fire survivors ang nagatinir sa tents.
Suno kay Ramos, ipalab-ot man sini sa DSSD ang mga reklamo sang mga evacuees agud nga mapangitaan sang alternatives kag solusyon.
