May yara na sang persons of interests ang mga kapulisan sa banwa sang Murcia, Negros Occidental sa nagpatay sa 27 anyos nga lalaki nga nasapwan sa Sunrise Village, Barangay Blumentritt, banwa sang Murcia, Negros Occidental sang Disyembre 31 sang aga.
Sa interview sang Bombo Radyo Bacolod kay Police Major Marc Joeil Reclamado, hepe sang Murcia Municipal Police Station, may yara sang concerned citizen nga nagpahibalo sa ila nga nasapwan nga patay nga tawo sa nasambit nga lugar.
Suno kay Reclamado, ginrespondehan sang mga kapulisan ang nabaton nga impormasyon kag didto nakita sang mga ini nga nagapungko kag may madamo nga mga pilas sa lawas ang biktima nga si Cornelio Buyco, 25 anyos kag residente sang Barangay Sta. Cruz sa nasambit nga banwa.
Suno sa hepe, may yara sang pilas sa ulo kag lawas si Buyco.
Suno diri, antes ang insidente, gin-alegar nga may upod nga tatlo ka mga persona ang biktima.
Nagagwa man sa imbestigasyon nga isa ka drug surrenderee ang biktima apang indi man maangot sa sa illegal nga druga ang kamatayon sang biktima bangud sa nakita sang mga police sa crime scene, nag-inum inum ang biktima kag mga kaupod sini.
Nagapadayon ang imbestigasyon sang otoridad sa insidente agud matumod ang motibo sa pagpatay kay Buyco kasubong man matumod ang may kahimuan sang krimen.
