May yara sang duha ka dugang nga persons of interests may kaangtanan sa pagpatay sa isa sa board of directors sang pribado nga eskwelahansa sa Barangay Dancalan, Ilog, Negros Occidental sang Agosto 5
Madumduman nga ang biktima ang ginkilala lamang nga si Alyas Pat, isa sa board of directors sang Dancalan Private Academy.
Ang gunman ang ginkilala naman nga si Vannie Galagate alyas Dodoy, 34 anyos, kag residente Sitio Gusnit, Barangay Pinggot, Ilog, Negros Occidental.
Madumduman nga matapos magdul-ong sang asawa sa buluthuan, ginpalapitan sang suspect si Pat kag gintiro, apang wala naglupok ang armas.
Naghunos man sang armas si Pat, nga nagresulta sa pagbayluhanay sang lupok, nga gintunaan sang kamatayon sang biktima.
May pulis naman nga malapit lamang sa lugar nga gilayon nga nakaresponder kag ginpasurrender ang suspect, apang ini ang nagbato.
Gani ini ang ginpalukpan man kag napatay sang nagresponder nga pulis.
Samtang, may nasamaran man nga tricycle driver, matapos masalabat man sang bala.
Sa interview sang Bombo Radyo Bacolod kay Police Major Randy Babor, hepe sang Ilog Municipal Police Station, may yara na sila sang natumod nga duha pa ka persons of interests nga may kaangtanan sa pagpatay sa biktima.
Suno kay Babor indi pa nila ini mabuyagyag sa kahanginan bangud nagapadayon pa ang imbestigasyon sang mga kapulisan.
Konplikto sa sa duta ang ginalantaw nga rason sang pagpatay sa biktima.
Dugang pa sang hepe nga ang biktima ang may mga records nga may kaangtanan sa konflikto sa duta.
Nagapanawagan man ini sa may impormasyon nga makabulig agud mahatagan sang hustisya ang biktima magdirekta sa pagpahibalo sa mga kapulisan agud nga makabulig sa imbestigasyon.
