May-ara na sang duha ka persons of interest ang Bacolod City Police Station 1 sa mahimo nagluthang-patay sa 31 anyos nga lot caretaker sa Palanca-Burgos St., Barangay 12, Bacolod City.
Ang biktima amo si Jordan Rafols, 31 anyos, residente sang Barangay 13, Bacolod City kag nagasakay sa tricycle sang sila ang hinali nga ginsundan kag ginlagas sang luthang sang riding in tandem suspects.
Si Rafols ang nakaangkon sang igo sang bala sa nanarisari nga bahin sang iya lawas kag ini ang gindala pa sa ospital apang ginbawian sang kabuhi.
Wala naman sang CCTV sa lugar gani ang kapulisan ang nagbasi lamang sa imbestigasyon sa mga nakawitness, pamilya kag mga abyan sang suspect.
Santo diri, may duha na sila ka ginatulok nga persons of interest, apang wala pa sang nakita nga ebidensya nga derekta nga nagatudlo sa duha, gani sila ang indi pa makabig nga suspect.
Ginatutukan nga mahimo motibo sang krimen ang personal grudge, kaangtanan sini sa isa ka persona ukon grupo ukon mahimo man nga may naka-away ini may kaangtanan sa trabaho.
Nagsugot naman ang pamilya nga ipaidalom sa autopsy ang bangkay sang biktima.
Madumduman nga nakuha sa mga pagkabutang sang biktima ang pila ka cash, folding knife, magazine sang armas luthang, kag IDs sang Bacolod Traffic Authority Office (BTAO) kag Criminal Investigation and Detection Group (CIDG), apang wala pa matumod ang legitimacy sang mga IDs ukon kaangtanan sang biktima sa mga departamento sang gobyerno.
