May lead na ang mga kapulisan sa ciudad sang Escalante, Negros Occidental sa pagtiro-patay sa 51 anyos nga lalaki nga ginakabig nga Top 1 City level drug personality sa ciudad.
Ginkilala ang biktima kay Edgar Cara-at, single kag siya ang gintiro sang siyam ka wala makilal-an nga armado nga mga persona sa iya mismo balay sa Sitio Napungalan 2, Brgy. Jonobjonob, Escalante City, Negros Occidental sang Domingo sang kaagahon, Disyembre 1.
Sa interview sang Bombo Radyo Bacolod kay Police Lt. Col. Albert Sy, hepe sang Escalante City Police Station, may yara na sila sang lead sa pagpatay sa biktima nga ginalakipan sang lansihanay sa illegal nga druga ukon personal bangod magluwas sa illegal nga druga, may mga tawo pa ini nga ginpautang sang kwarta nga sakaan.
Suno kay Sy, ginahulat pa sang mga kapulisan ang resulta sang imbestigasyon sang Scene of the Crime Operation (SOCO) apang una na nakita sang mga kapulisan nga may yara sang pilas sa nawala nga mata ang biktima.
Suno diri, ginapahayag sang mga nakawitness nga ang nagsulod sa balay sang biktima ang may mga dala nga malagba nga armas.
Narecover sa crime scene ang magnum 357 revolver, loaded nga improvised pistol kag apat ka holster sang short firearms.
Dugang pa nga narecover ang mga pakete sang suspected shabu kag granada.
Ginalantaw nga ang mga recoveries ang ginapanag-iyahan sang biktima kag suno sa witness may gindala pa ang mga suspect nga long firearms nga ginapahayag iya man sang biktima.
Ginpahayag man sang witness nga may kaupod si Cara-at kag may natabo pa nga pagbayluhanay sang lupok, kun sa diin si Cara-at ang napagtay samtang nakapalagyo naman ang iya kaupod.
Suno kay Sy, padayon pa ang ila nga imbestigasyon agud mahibaluan ang motibo kag ang suspek nga nagpatay sa biktima.
