Nagalaom ang Bacolod City Police Office sang kooperasyon sang mga pumuluyo sa highlight sang Masskara Festival 2024.
Sa interview sang Bombo Radyo Bacolod kay Police Lt. Col. Lester Leada, Deputy City Director for Operation sang BCPO, dapat nga hibaluon na sang mga motorista kag festival goers ang mga routa nga isarado sa pagpatigayon sang Masskara Street Dance padulong sa Arena Competition sa Paglaum Sports Complex.
400 ka mga Police personnel ang ideploy nga pamunuan ni Police Major Junji Liba samtang deputy naman sini si Police Captain Peter John Ramos.
Magluwas sa kapulisan kag covert security, may mga magabulig man nga mga estudyante nga kabahin sang Reserved Officer Training Corps (ROTC) kag National Service Training Program (NSTP) sa pagbantay sa kilid sang karsada halin sa Bacolod Public Plaza.
Hingyo sini sa mga pumuluyo nga magkooperar kag magsunod sa instruction sang kapulisan kag road marshal.
May-ara naman sang tatlo ka judging area sa dalan padulong sa Paglaum Sports Complex.
Ginalauman ni Leada nga temprano pa matapos ang programa bangod ang Arena Competition ang natalana suguran alas-3:00 sang hapon.
Antes paman sini ang Street Dance competition, samtang pito lamang ang gin-akomodar nga Barangay participants nga tuman ka dyutay kun ipaanggid sa anay napulo pasaka nga performers.
Ginalantaw sini ang posibilidad nga alas-7:00 pa lamang tapos na ang programa.
Kasunod sini ang mga kapulisan ang igabalik naman sa ila orihinal nga deployment magluwas sa mga personnel sang Bacolod Police Station 1 nga nakasakop sa area.
Panawagan man ni Leada nga isecure ang mga pagkabutang kasubong man ang magagmay nga kabataan.
Panugyan sini nga butangan sang kulintas nga may pangalan, address kag contact number ang mga edad apat tubtob pito ka tuig nga kabataan bangod ang mga ini ang masami nga nagasipak sa mga ginikanan kun may makaagaw sang ila atensyon.
