May yara na sang isa ka person of interest ang mga kapulisan sa Candoni, Negros Occidental sa nagpatay sa 13 anyos nga dalagita nga nasapwan sa katubuhan sa sa Sitio Lawagon, Brgy Poblacion West, Candoni, Negros Occidental.
Ang biktima ang ginkillala nga si Alyas Rica, residente sang Prk Pag-ulinganan, Brgy Haba.
Sa interview sang Bombo Radyo kay PLt Leonel Adolacion, acting chief of police sang Candoni Municipal Police Station, may yara na sila sang natumod nga person of interest sa may kahimuan sa dalagita.
Suno kay Adolacion napaidalom naman sa post mortem examination ang bangkay sang biktima kag ginahulat nalang ang resulta.
Una na nga ginpahayag ni Adolacion nga sang Abril 26, alas-7:00 sang gab-i, ginsugo ang dalagita nga magbakal sang ice sa tyangge apang wala na ini nakapauli.
Nagpati ang ginikanan nga nahapit ang bata sa iya abyan apang sang ginpangita ini, wala sang may nakahibalo kun diin ini nagkadto.
Alas- 8:20 sang gab-i sang Abril 27, nasapwan sang 15 anyos nga lalaki kag sang iya abyan ang bangkay ni Rica sa sulod sang kampo sa Brgy Haba.
Suno kay Adolacion, nasapwan ang bangkay ni Rica malayo sa ila balay kag sa pihak na nga barangay.
Nasapwan ini nga may duha ukon tatlo ka pilas sa agtang nga ginapatihan tuga sang pagpanglampos.
Samtang kumpleto naman ang iya panapton.
Nagapadayon sa karun ang imbestigasyon sa kaso sang biktima agud nga matumod ang motibo kag may kahimuan sang krimen.
