May yara na sang persons of interest ang Bacolod Police Station 8 sa nagtiro-patay sa 27 anyos nga lalaki sa sulod sang iya balay sa Purok Roma, Brgy Singcang Airport, Bacolod City, kahapon sang kaagahon.
Ginkilala ang biktima kay Rolando Ermeo Jr. kag residente sang nasambit nga lugar.
Sa interview sang Bombo Radyo Bacolod kay Police Captain Greeky Cayao, station commander sang Bacolod City Police Station 8, nagapadayon pa ang ila imbestigasyon sa nagluntad nga shooting incident apang may yara na sila sang persons of interest.
Suno kay Cayao, ginatsekyar nila sa karun ang natabo sa biktima sadtong Disyembre kun may kaangtanan ini sa natabo diri sa karun.
Suno kay Cayao, sa panaysayon sang pamilya sang biktima sang Disyembre may yara sang nagtapungol sa biktima kag ini ang ginpahog pa.
Ang biktima ng may record naman matapos ginareklamo may kaangtanan sa mga nagkaladula nga tanom sa ila nga lugar kasubong man sa pagpanakit sa iya asawa.
Ginpahayag man sang pamilya sang biktima nga may yara ini sang bisyo nga nagagamit sang illegal nga druga.
