Wala untat ang paglibot kag pagbantay sang Bacolod City Police Office sa Negros Occidental Capitol Lagoon sa pagpatigayon sang ‘National Rally for Peace’ sang Iglesia Ni Cristo.
Sa interview sang Bombo Radyo Bacolod kay Police Col. Joeresty Coronica, city director sang Bacolod City Police Office, matawhay ang pagpatigayon sang aktibidad apang ang challenge lamang sa ila amo ang tuman ka bug-at sang traffic.
Suno diri, bisan siya naglakat na lang halin sa regional hospital para makalibot sa area.
Sa ginalauman nga 50,000 tubtob sa 70,000 ka mga participants, nagdeploy ang BCPO sang kapin sa 150 ka mga police samtang yara man sa area ang Bacolod Traffic Authority Office (BTAO), kag Disaster Risk Reduction & Management Office (DRRMO), Bureau of Fire Protection (BFP), kag Public Order and Safety Office (POSO) samtang may yara man sang mga marshal gikan sa INC nga nagabulig sa pagsecure sa area.
Pahayag ni Coronica, nagapangayo lang ini sang pag-intindi sa mga pumuluyo sa karon nga mabug-at ang lakat sang trapiko.
Ini kasunod sa road closure nga ginpatigayon sa bahin sang North kag South Capitol Road kag Cottage Road tubtob sa 15th street.
