Nagpaandam ang mga kapulisan sa mga pumuluyo nga nagalagaw subong nga Christmas season nga mag-aligmat sa nagataas nga kaso sang laglag-barya modus operandi.
Sa interview sang Bombo Radyo Bacolod kay Police Regional Office 6 spokesperson Police Lt Col Arnel Solis, wala pa sang nareport sa Western Visayas apang ang kaso sang laglag-barya ang nagaduging na sa karun sa Metro Manila.
Sa masami, may-ara sang isa nga nagahulog sang sensilyo agud madistract ang persona nga yara sa matawo nga lugar kaangay sang merkado, bus, terminal, mall kag iban pa.
Samtang distracted ang biktima, may-ara sang isa nga nagakuot ukon kuha sang mga valuables kaangay sang cellphone, wallet, kwarta ukon bag sang biktima, kag may-ara man sang nagabalabag agud matabunan ang vision sang biktima kag indi makita ang nagakatabo.
Kun kis-a sila ang may iban pa nga kaupod nga ginapasahan sang kinawatan agud nga indi hapos madakpan.
Suno kay Solis, ini ang madugay na nga modus operandi sang mga wala sang maayo nga tinutuyo, nga sa masami nagahulag nga grupo.
Mensahe sini nga likawan ang pagpasayang-sayang sang kwarta sa matawo nga lugar nga mahimo maka-engganyo sang malain nga elemento.
