Nagapaayo pa sa ospital ang isa sa mga biktima sang shooting incident nga nagluntad sa Purok Active, Brgy Mandalagan, Bacolod City kahapon sang aga.
Madumduman nga isa ang napatay samtang isa man ang nasamaran matapos nga ginluthang ang mag-utod sang wala matumod nga riding in tandem suspect.
Ang mga biktima ang ginkilala nga sanday Harold kag Harly Espina.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, nagapaayo na sa ospital si Harly matapos nga ini ang gin-operahan.
Suno kay Tapang, natalana subong nga adlaw estoryahon nila ang biktima bangod ini ang nakabugtaw na.
Padayon naman ang imbestigasyon sang mga kapulisan sa Bacolod Police Station 3 sa motibo sa pagluthang sa mag-utod.
Ang mga biktima ang wala man sang record sa Barangay kasubong man sa police station.
Una na nga ginpahayag sang nakawitness nga ang isa ka suspek ang wala sang tabon ang nawong kag nagasuksok sang pink nga tshirt, kun sa diin sila ang nagasakay sa pula nga Rusi nga motorsiklo nga wala sang plaka.
Dead on the spot ang magulang nga si Harold matapos nga gintiro sa likod nga naglapos sa dughan, samtang gintiro man sa likod ang manghod nga si Harly apang nahingagaw nga madala sa ospital.
Samtang, narecover man sa sulod sang bag ni Harold ang isa ka armas luthang.
Ini naputos sa pula nga bayo kag may anum ka bala.
Samatang una naman nga ginpahayag ni tapang, nga ipaidalum pa sa forensic examination ang nakumpiskar nga unknown calibre.
