Nagapatigayon sa karun sang backtracking ang mga kapulisan sa mga CCTV footages nga makita sa palibot sang crime scene sang pagpangluthang-patay sa Purok Zone 1, Barangay Handumanan, Bacolod City kahapon.
Ginkilala ang biktima nga si Henry Salbibia, caretaker sang propedad kag nagatrabaho sa Negros Economic Development Foundation, Inc. kag anay nagpadalagan bilang Barangay Kagawad sa banwa sang Murcia apang wala makadaog.
Sa interview sang Bombo Radyo Bacolod kay Police Capt. Sherwin Galupar, station commander sang Bacolod Police Station 10, may person of interest na ang Bacolod Police Station 10 sa nagluthang sa biktima kahapon sang udto.
Apang ini ang indi pagid magmatch sa identity sang suspect gani nagapadayon pa ang ila nga backtracking sa mga CCTV footage nga makita sa palibot sang crime scene.
Suno kay Galupar, may yara man sila sang nakita nga iban nga CCTV footages agud matumod kun sa diin nagkadto ang suspek.
Ginkumpirmar man ni Galupar nga naga-isahanon lamang ang suspetsado santo sa nakita sa mga CCTV footage.
Ang biktima ang nakaagom sang pilas sa ulo nga ginalantaw gintunaan sang iya kamatayon.
Sa karun padayon pa ang imbestigasyon sang mga kapulisan sa shooting incident agud nga matumod ang motibo kag ang suspetsado sa krimen.
