Ginapangita pa sa karun sang kapulisan ang entrance sa isa ka underground bunker sa sulod sang 30 ka hektarya nga compound sang Kingdom of Jesus Christ nga ginapatihan ginapanaguan sang pugante nga si Pastor Apollo Quiboloy.
Suno kay Police Maj. Catherine Dela Rey, ang tagpamaba sang Philippine National Police Davao Region, may nakit-an nga “heartbeats” nagikan sa underground ang life detection devices nga ginagamit para sa mga rescue mission kada may linog nga matabo.
Ang bayolente nga protesta sang mga miyembro sang KOJC sa sulod sang compound ang nagapakita man nga nagapanago didto si Quiboloy.
Indi magnubo sa 18 ka mga persona ang naaresto sa PNP sang Lunes sang hapon matapos nagdisperse ang mga ini kag nahukas sang mga pulis ang barricade nga ila ginbutang sa dalan sa atubang sang compound.
Ini ang latest nga attempt sang mga pulis sa pagserbe sang warrant of arrest batok kay Quiboloy nga nagapangatubang sa karun sang child and sexual abuse kag trafficking cases sa mga korte sa Davao City kag Pasig.
