Padayun pa ang imbestigasyon sang Bacolod Police Station 1 agud matumod ang suspetsado nga nagluthang-patay sa 24 anyos nga lesbian sa Purok Boulevard, Barangay 14, Bacolod City.
Madumduman nga ang biktima nga si alyas “Babes” Gonzales ang ginluthang sang suspetsado nga nakasuksok sang bonnet sa ila mismo nga puluy-an.
Sa interview sang Bombo Radyo Bacolod kay Police Mayor Elmer Bonilla, station commander sa Bacolod Police Station 1, gin-abiso na lamang nila sa pamilya sang biktima nga makig-angot sa ila matapos ang pagplastar sang haya.
Nagalaom si Bonilla nga mapaluad pa nila ang mga ginikanan sang dugang nga impormasyon nga mahimo makahatag sang lead sa kaso.
Sa karun isa sa anggulo nga ginatutukan amo ang ginaalegar kaangtanan sini sa illegal nga droga, nga gin-ako man mismo sang iya amay kag live-in partner.
Apang magluwas diri, ginalantaw man nga motibo ang pagpangimon bangod nagbulagay ang kalive-in sini kag anay nobyo sini matapos nga mapriso bangod man sa illegal nga droga.
Gani yara ang posibilidad nga ini ang nagsugo sang persona nga magluthang sa lesbian.
Gina-imbestigaran man sa karun kun ang gina-alegar nagapanilag sa biktima sang nakaligad amo ang suspetsado.
Ini bangod suludlon ang ila nga balay, kag madulom ang area apang hungod pa sini ginsulod ang biktima kag ginhimo ang krimen.
Wala man sang CCTV camera sa lugar.
