Padayun pa nga ginalagas sang Silay City Police Station ang lalaki nga nagluthang-patay sa bangkador sa peryahan sang Barangay Guimbalaon, Silay City kaina sang kaagahon.
Ang suspetsado ang ginkilala nga si Pedrito Penafiel, residente sa Hacienda Dolores sang nasambitan nga Barangay.
Ang biktima nga napatay amo si Allan Tamparong, 34 anyos ang residente sa Barangay Payao, Binalbagan, samtang may duha ka iban pa nga nasamaran.
Sa interview sang Bombo Radyo Bacolod kay Police Lt. Col. Mark Darroca, hepe sa Silay City Police Station, sila ang nakarecover sang anom ka fired cartridges sang wala pa matumod nga armas luthang sa crime scene, samtang nagapadayun man ang ila nga hot pursuit operation.
Ginalibot man nila ang tanan nga mahimo palagyuhan sang suspetsado.
Sa ila nga pag-usisa ang suspetsado ang anay napriso na apang ila pa nga ginatsekyar sa data base sang Silay City Police Station kun ano ang kaso sadto sang suspect.
Ipasaka man nila gilayon ang kaso kun makompleto na ang kinahanglan nga dokumento.
