Nagapakita lamang sang massive campaign sang kapulisan batok sa iligal nga druga ang pagpanguna sang Bacolod City sa may may pinakamadamo nga nakumpiskar nga illegal nga droga kag buybust operations nga ginpatigayon sa Western Visayas suno sa spokesperson sang Bacolod City Police Office.
Sa interview sang Bombo Radyo Bacolod kay P/Lt. Col. Ariel Pico, ginpahayag sini nga bilang isa ka higly-urbanized city ang Bacolod, mandato sa mga police station nga magpatigayon sang buybust operation.
Dugang pa sini nga nagapakita lamang ang record sang regional oversight committee nga aktibo ang kapulisan kag prayoridad gid ang anti-illegal drugs campaign sa ciudad sang Bacolod.
Madumduman nga gintawag ni City Drug Enforcement Unit Head Police Lt. Col. Jovie Espenido nga “shabulized city” ang ciudad.
Una na nga ginpahayag ni Philippine Drug Enforcement Agency (PDEA) Region 6 director Alex Tablate, masobra siyam ka kilo ang illegal nga droga ang nakompiskar sang ciudad sang tinalikdan nga tuig kag sa 61 ka mga barangay, wala pa nakadangat sa 10 ang nadeklarar nga drug cleared.
Nagasunod naman ang ciudad sang Iloilo sa may pinakamadamo nga anti-drug operations apang suno sa director, gamay ang ila nga recoveries.
