Ginapahanumdom sa mga kapulisan ukon may complaints batok sa mga kapulisan nga may mga nagakadapat nga opisina nga sarang mapalapitan.
Sa interview sang Bombo Radyo Bacolod kay Police Lt. Col. Ronnie Brillo, commander sa Bacolod City Mobile Force Company kag spokesperson ni Bacolod City Police Office Director Police Col. Noel Aliño, ang Philippine National Police ang may-ara sang grievance committee para sa mga indi paghangpanay sa tunga sang parehas nga police personnel.
Kasubong man yara ang City Investigation Detective Management Unit (CIDMU) at Women and Childrens Protection Desk (WCPD) kag ang opisina sang BCPO Director nga sarang magcater sang mga PNP to PNP nga mga issues, private to PNP ukon private to private.
Ini ang gin-athag kasunod sang pagluthang patay ni Patrolman Alvin Rios, 26 anyos sang Mobile Patrol Unit sang BCPO kay Police Staff Sergeant Jotham Aremtuto, 31 anyos, kasado sang 1st Mobile Force Company sang Iloilo Police Provincial Office.
Ang pagpangluthang ang natabo matapos maaktuhan ni Rios si Aremtuto nga yara sa kwarto sang ila balay, wala sang panapton kag upod ang iya live in partner kag duha ka bulan nila nga lapsag.
Paathag ni Brillo nga kuntani mahimo nga nasettle pa ang problema kun gindangop sa talatapan kag kun indi nagid masolbar, ang opisina ang handa nga maggiya sa pagpasaka sang kaso.
Bangod sa pagpatay si Rios ang mahimo mangatubang sang kaso kriminal kag administratibo.
Ginakasubo man ni Aliño ang pagkadula sang PNP personnel kag ini ang nagmando naman sang maidid nga imbestigasyon sa kaso.
