Padayun ang monitoring sang mga kapulisan sa Bacolod City sa mga nagabaligya sang palupok sa gwa sang Fire Cracker Zone.
Sa interview sang Bombo Radyo Bacolod kay Police Captain Ma. Liberty Indiape, spokesperson sang Bacolod City Police Office, nagmando na si BCPO Director Police Col. Joeresty Coronica sa mga station commanders sa Bacolod City Police Station 1 tubtob 10 nga libuton ang ila areas of responsibility kun may indi otorisado nga nagabaligya sang palupok.
Nahibaluan nga sa tupad sang Pope John Paul II Tower sa reclamation area lamang ang otorisado nga makabaligya sang palupok kag may-ara man sang designated fire cracker zones.
Apang sa karun, sila ang wala pa sang may nadakpan nga illegal nga nagabaligya sang palupok.
Suno kay Indiape, nakadepende sa kabug-aton sang violation ang penalidad kun sa diin sa minor violations, mahimo lamang kumpiskaron ang ila mga baligya.
Apang sa mas mataas nga penalidad, mahimo pamultahon sang P20,000 tubtob P30,000 ang violators, mapriso sang anom ka bulan tubtob isa ka tuig, ukon parehas nga magamulta ukon mapriso kag mahimo man nga masuspender ang business permit santo sa Republic Act 7183 ukon Firecracker Law.
Pahanumdom man nga indi pwede magbaligya sa minors kag indi man pwede makadisplay sa mga establishimento kalakip na sa malls, kundi sa designated firecracker selling area gid lamang.
