Preparado na ang Bacolod Police Station 1 sa paghatag sang seguridad sa mga aktibidades nga patigayunon may kaangtanan sa Semana Santa.
Sa interview sang Bombo Radyo Bacolod kay Police Major Elmer Bonilla, station commander sa Bacolod Police Station 1, sa isa ka semana nga pagsaulog sang Semana Santa, isa sa mga masako nga lugar amo ang simbahan.
Gani sila ang magaplastar sang Police assistance desk sa San Sebastian Cathedral kag Lupit Church nga yara sa ila area of responsibility.
Suno diri, magahamtang sang tagduha ka mga Police personnel sa atubang sang kada simbahan, agud nga sa pagsulod pa lamang sang mga ini kun sila ang may concern, sarang nila nga mapalapitan ang mga kapulisan.
Magluwas sa mga kapulisan, may mga augmentation man gikan sa mga force multiplier kasubong man ang on-standby nga ambulansya gikan sa Bacolod City Disaster Risk Reduction and Management Office (CDRRMO).
Pahanumdom naman ni Bonilla sa mga maga-upod sa pagsaulog kag mga aktibidades sa Semana Santa nga dapat may kaupod sa paggwa partikular na kun kaagahon ukon kagab-ihon.
Ini agud malikawan ang mabiktima sang mga persona nga may malain nga tinutuyo, nga masami nagatarget sang mga naga-isahanon sa dalanon.
