Preparado na ang Bacolod City Police Office sa pagpatigayon sang Comelec Checkpoint.
Sa interview sang Bombo Radyo Bacolod kay BCPO Director Police Col. Joeresty Coronica, naplastar na ang mga personnel nga assigned sa nanarisari nga Comelec Checkpoint areas.
Suno diri, kadungan sa Election Period nga maga-umpisa alas-12:00 bwas sa kaagahon, Enero 13, maga-umpisa naman ang Comelec gun ban.
Kasunod sini lauman na sang mga motorista nga ang kapulisan ang magapatigayon sang Comelec Checkpoints sa nanarisari nga designated area.
Sa ulihi nila nga pagtsekyar sa Comelec Bacolod, wala pa sang naka-apply para as exemption sa gunban, gani tanan nga madakpan nga naga-uyat sang armas sa gwa sang balay, magluwas sa mga law enforcement officers ang pagadakpon kag mapasakaan sang kaso sa pagbayolar sa Election Gunban.
Ginavalidate man nila kaupod sa militar ang natuhoy sa sightings sang 10 kag 30 ka armado nga mga persona sa Barangay Felisa, kun ang mga ini ang isa lamang ka grupo ukon separado.
Isa sa ginalantaw nga anggulo sa pagtuhaw sang mga ini amo ang posibilidad sang pagpangharras, ukon may-ara sang agawon nga propedad sa area.
Wala naman sang Election areas of concern sa Bacolod City.
