Nakahanda na ang security preparation sang Bacolod City Police Office (BCPO) para sa mga patigayunon nga labor rally sa Mayo 1, International Labor Day.
Sa interview sang Bombo Radyo Bacolod kay Police Lt. Col. Ronnie Brillo, pinuno sa Bacolod City Mobile Force Company, nagakuha sang permit ang mga rallyhista sa Bacolod City Government, apang pasalig sini nga may permit man ukon wala, ang kapulisan ang magabantay agud maseguro ang malinong kag matawhay nga pagpatigayon sang labor rally.
Ginapakamaayo sini nga indi man bayolente ang mga ginapatigayon nga rally sa ciudad sang Bacolod.
Paathag ni Brillo nga sila ang magadeploy sang uniformed personnel kasubong man mobile patrol nga maga-assist sa mga rallyhista.
Sila ang magahamtang man sang medical team kag kun kinahanglan magapahamtang sang ambulance agud maseguro ang kahilwayan sang mga magapartisipar.
