Preparado na ang Bacolod City Police Office sa paghatag sang seguridad sang publiko kag pagpabilin sang kalinong kag katawhay kadungan sang patigayunon nga mga rally bangud sa State of the Nation Address (SONA) ni President Ferdinand Marcos Jr subong nga adlaw Hulyo 27.
Sa interview sang Bombo Radyo Bacolod kay Police Lt Col. Lester Leada, Deputy City Director for Administration sang Bacolod City Police Office, kinahanglanon sang mga grupo nga magapatigayon sang rally-protests ang magsiguro sang permit nagikan sa Bacolod City Government kag ang isa sa mga signatories ang BCPO bisan pa nga ang aktibidad ang patigayunon sa freedom park ukon sa Public Plaza.
Sa karun suno sa Deputy City Director for Administration sang BCPO, isa pa lamang ka grupo ang may yara na sang permit kag ini ang Bayan Muna samtang mahimo man ini madugangan bangud may yara pa sang mga grupo ang padayon nga nagaproseso sang permit.
Suno kay Leada, nakakoordinar naman sila sa Bacolod City Fire Station kag Bacolod City Disaster Risk Reduction Management Office para sa augmentation ingkaso nga mag-escalate ang sitwasyon.
Ginpahayag man sini nga dapat kada grupo ang magsiguro sang permit apang kun kaisa may isa lamang ka grupo nga nagaproseso sang permit kag ululupod nalang nga nagapatigayon sang rally.
Suno kay Leada, ginasiguro man nila nga sa Freedom Park ang indi magsalalamo agud nga masiguro ang matawhay nga pagpatigayon sang nasambit nga aktibidad.
Samtang ginadumilian na ang mga rallyista sa pagsunog sang mga effigy sang presidente sa mga patigayunon nga rally-protests bangud sa pagsulundan sang Department of Environment and Natural Resources (DENR).
Panawagan sini sa mga protesters nga magsunod lamang sa tanan nga pagsulundan sang ciudad sa pagpatigayon sang protesta.
