Matawhay na kag wala na sang pagginutok sa dalan sa Mount Hermit sa Barangay Biao, Binalbagan matapos ang pagdagsa sang mga tawo nga nagpadulong para makita ang manami sini nga view.
Madumduman nga nakaligad nga Enero nagdagsa ang mga tawo sa dalan sa Mt. Hermit agud magbisita, gani sumugod Pebrero 4 ginpahanugutan nga 1,000 na lamang ka mga turista ang makasaka sa bukid.
Sa interview sang Bombo Radyo kay Police Major Ellendie Rebusquillo, hepe sang Binalbagan Municipal Police Station, wala na nagdugok ang mga tawo sa Mount Hermit gani nangin matawhay na ang dalan.
Apang, gina-ekspektaran sini nga madamo naman ang magapadulong karun nga Semana Santa bangod sa manami sini nga view kag ambiance.
Suno diri, maga-koordinar ini sa kapulisan kag bantay bukid sa pagconduct sang monitoring kag checkpoint sa magabisita sa area.
Sa karun, wala naman ginlimitahan ang numero sang makasaka kag indi naman kinahanglan pa nga magparegister sa Tourism Office sang banwa ang tanan nga luyag magsaka sa Mt. Hermit.
