Preparado na ang Cadiz City Police Station para sa highlights sang 51st Dinagsa Festival subong nga adlaw, Enero 26.
Sa interview sang Bombo Radyo Bacolod kay Police Lt. Lovella Cordova, Deputy Chief of Police sang Cadiz City Police Station, bilang kabahin sang security plans, nagbutang sang mga police personnel sa mga ginpahamtang nga watch tower sa ciudad.
Suno kay Cordova, magluwas sa mga watch towers may yara man sang mga kapulisan nga nagaronda sa mga eskinita sang ciudad kag agud man may yara sang pamangkutan ang mga pangayaw nga magapadulong sa ciudad subong nga adlaw.
Suno diri, wala man sang narecord nga mga untoward incidents nga nagluntad antes ang highlights sang festival.
Ginpahayag man sini nga subong nga adlaw may yara sang patigayunon nga road closure sa crossing Cadiz kag sa bangga access road sa national road sang ciudad.
Nagbutang man sang police personnel nga magabantay sang trapiko kag may designated nga parking area kaangay lamang sa kilid sang Hitalon bridge sa reclaimation area.
Malayo naman ang parkingan sang mga salakyan agud nga malikawan nga malamhitan sang pinta.
Samtang ginadumilian ang pagkadto sa festival site ang pagdala sang mga matalum nga bagay, ginadumilian man ang pagdala sang dalagko nga bag kag indi dapat pikon.
Wala ginapahanugutan ang paggamit sang water gun ukon spray paints— pangalipay lang, indi magpanghalit.
Ginadumilian ang pagdala sang glass bottles sa dalan, agud masiguro ang safety sang mga magabuylog sa kapistahan.
Indi man pwede maggamit sang enamel nga pinta, water-based paint lang ang dapat usaron sa lamhitanay.
Ginapaandaman man ang publiko angut sa paggamit sang scandalous signs, mangin matinahuron bilang ini ang kapistahan sang Señor Sto. Niño.
