May yara na sang persons of interest ang Silay City Police Staotion sa nagpatay sa 63 anyos nga inkargado matapos ginluthang sa Hacienda San Isidro, Brgy Bagtic, Silay City sang Byernes sang aga.
Ang biktima ang ginkilala nga si Ricardo Grullo, kasado, residente sang Hacienda Bias 1, Brgy Guimbalaon, Silay City.
Sa interview sang Bombo Radyo Bacolod kay Police Lt Col. Mark Antony Darroca, hepe sang Silay City Police Station, may yara na sila sang pangalan sang persons of interest santo man sa CCTV footages nga nakuha sa area.
Suno kay Darroca, duha ka persona ang ila ginalantaw nga responsable sa nagpatay sa enkargado.
Ginaimbestigaran pa ang motibo sa pagpatay sa biktima.
Suno sa hepe, ginpayag man nga maayo kag mabuot nga klase sang tawo ang biktima.
Ginalantaw man sang mga ini nga ginbayaran ang nagpatay kay Grullo.
Madumduman nga nagdul-ong ang biktima sa iya manunudlo nga bata sa masakyan sini padulong sa eskwelahan kapin alas-6:30 tubtob alas-6:40 sang aga.
Apang sang siya ang papauli na, didto ini gintambangan kag ginluthang.
Ang motor sang biktima ang kaangay nga nagliko pa sa isa ka gamay nga dalan antes matumba, nga mahimo nga agud makapangayo sang bulig.
Narecover ang pito ka basiyo sang bala kag isa ka slug sa lugar kag kaangay nga gin-ubos gid ang isa ka magazine sang cal. 45 pistol.
Ang biktima ang nag-agom sang tatlo ka igo sang bala sa lawas nga ginalakipan sang duha sa tiyan kag isa sa abaga, kasubong man ang isa sa ulo nga naglapos sa iya helmet.
