May persons of interest na ang mga kapulisan sa ciudad sang Himamaylan sa nagluthang patay sa isa ka babayi sang tinalikdan nga Nobyembre 14, sa Sitio Taytay 3, Brgy. Carabalan, ciudad sang Himamaylan, Negros Occidental.
Ginkilala ang biktima kay alyas Army, 47 anyos, kasado, residente sang nasambit nga lugar kag isa ka Bantay Lasang.
Sa interview sang Radyo Bacolod kay Police Lt Col Anthony Grande, hepe sang Himamaylan City Police Station, padayon ang ila imbestigasyon kag may natumod na nga persons of interest samtang nagapadayon ang ila nga pagtipon sang ebidensya para sa ipasaka nga kaso batok sa responsable sa krimen.
Suno kay Grande, ginalantaw nga rason nga pagpatay sa biktima amo ang personal grudge bangud man sa ubra sini bangud siya ang nagareport sa mga kapulisan kag sa iban nga ahensya sang gobyerno sang illegal nga pagtapas sang kahoy sa lugar.
Suno kay Grande, natabo ang krimen sang Nobyembre 14 sang gab-i kag sa nabukid nga bahin sang ciudad.
Suno sa witness sang natabo ang shooting incident, siya kag ang biktima ang yara sa sulod sang balay sang hinali lang nagsulod ang lima ka armado.
Ang duha ang nag-uyat sa witness kag gindala siya sa kusina samtang ang tatlo gindala sa gwa sang balay ang biktima kag didto nabatian sang witness ang duha ka lupok.
Nakaangkon sang duha ka pilas ang biktima, isa sa guya nga naglapos sa likod sang ulo kag sa naidalom nga bahin sang likod sini.
Antes pa man ang shooting incident gin-ukay pa sang mga armado ang balay sang witness.
Narecover sa lugar ang duha ka empty shell sang caliber 45 kag duha man ka empty shell sang M-16.
