Nagapanawagan ang Moises Padilla Municipal Police Station sa kun sin-o man ang may impormasyon angot sa suspek nga nagsipa sa 21 anyos nga babayi nga napatay matapos maguyod sang motorsiklo sa Sitio Balogo, Brgy. Magallon Cadre, Poblacion, Moises Padilla, Negros Occidental, sang Miyerkules sang hapon.
Sa interview sang Bombo Radyo Bacolod kay Police Major Romulo Gepilango, hepe sang Moises Padilla Municipal Police Station, nakakuha sila sang CCTV footage apang malayo ang kuha sini.
Suno diri, wala pa sa karun nahibaluan ang rason kun ngaa ginsipa sang suspek ang biktima nga si Deserie Tadena.
Apang nagpasalig naman ang tiyo sang biktima nga kun makita sini ang suspek iya ini makilal-an.
Panawagan ni Gepilango sa kun sin-o man ang may impormasyon angot sa suspek nga magpalapit lang sa kapulisan agud mahatagan sang hustisya ang kamatayon sang 3rd year College student sa kurso nga Bachelor of Science in Elementary Education sa Central Philippine State University.
