Preparado ang Bacolod Police Station 1 sa pagbantay sa patigayon nga A Trillion Peso March sang nagkalainlain nga sektor sa Bacolod City Public Plaza.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, ang anti-corruption rally nga gin-organisar sang mga kaparian kag iban pa nga mga sektor ang maga-umpisa sa pagmartsa sa Lupit Church kag North Capitol Road ala-1:30 sang hapon padulong sa Bacolod City Public Plaza.
Pasalig ni Depasucat nga may nakapreparar na nga augmentation ang Bacolod City Police Office para maseguro ang peace and order sa patigayunon nga rally.
Nagalaom ang station commander nga mapabilin nga generally peaceful ang aktibidad kag wala sang may maga-intra nga lain ang tinutuyo.
Wala naman ginalauman nga magakinahanglan sang shield bangod malinong man ang nakaligad nga A Trillion Peso March indi kaangay sa Manila nga may nagluntad nga kinagamo.
Suno kay Depasucat, may area lamang nga pwestuhan ang mga kapulisan agud indi maka-intimidar sa mga nagaprotesta.
Paathag sini nga may kinamatarong ang mga pumuluyo nga magprotesta kag magpabutyag sang sintimyento basta indi lamang magtuga sang kinagamo.
Nagapati ini nga nakahibalo naman ang mga rally organizers sang ginadumilian, kaangay sang pagsunog sang mga placards.
Samtang, ginpasalig sang Negros Occidental Police Provincial Office nga luwas sa 80 ka police personnel nga ideploy para magbantay sa patigayunon nga Trillion Peso March 2.0 bwas, sila ang magakoordinar man sa mga local government units nga labayan sang caravan sang mga magaprotesta.
Sa interview sang Bombo Radyo Bacolod kay NOCPPO Spokesperson Police Captain Judesses Catalogo, may tagsa na ka preparasyon ang kada police stations para sa paghatag sang security upod sa Bureau of Fire Protection, Philippine Coast Guard kag mga local Disaster Risk Reduction and Management Offices sang mga banwa kag ciuadad nga malabayan.
Ang Philippine Army ang may-ara man sang separado nga function.
Suno kay Catalogo, magluwas sang paghatag sang road security, ang kapulisan ang magatap man sang ambulance nga mastandby sa pila ka mga lugar agud mas madasig nga makaresponder kun may-ara sang magakinahanglan sang medical assistance.
Nagalaom si Catalogo nga mapabilin ang secured, peaceful kag orderly nga anti-corruption rally.
