May yara na sang person of interest ang Negros Occidental Police Provincial Office sa duha ka bomb threat sa eskwelahan sa ciudad sang Himamaylan kag Kabankalan.
Madumduman nga nakabaton sang bomb threat ang West Visayas State University – Himamaylan Campus pasado alas-12:00 sang hapon sang Nobyembre 19 kag Central Philippines State University sa ciudad sang Kabankalan, pasado ala-1:00 kahapon sang kaagahon, Nobyembre 20.
Sa interview sang Bombo Radyo Bacolod kay NOCCPO Spokesperson Police Captain Judesses Catalogo, may yara na sila sang person of interest apang indi pa nila mabuyagyag kun pila ka bilog.
Suno diri, indi pa mahibaluan kun ano ang motibo tubtob nga wala pa makilal-an kun sin-o ang sa likod sang bomb threat.
Suno pa diri, nagakoordinar na ang lokal nga police stations sa mga eskwelahan bangod mga buluthuan sa karun ang target sang nasambit nga pagpamahog.
Pahayag ni Catalogo, ginalantaw nila ang tanan nga anggulo kag ginakonsiderar sang kapulisan nga seryuso ang tanan nga tawag nga ila mabaton.
Pasalig sini bisan nga bomb joke pa ang ila mabaton, nagaresponde gid sila para masiguro nga safe ang lugar.
Hugot man sini nga ginakondenar ang natabo nga nagatuga sang kakulba kag kinagamo sa publiko.
