Preparado na ang Police Regional Office 6 sa pag-abot ni President Ferdinand ‘Bongbong’ Marcos Jr. sa probinsya sang Negros Occidental subong nga adlaw.
Ang presidente magapatigayon sang proclamation rally sang Alyansa Para sa Bagong Pilipinas sa ciudad sang Victorias kag siya ang magabisita man sa mga evacuees sang paglupok sang bulkan Kanlaon sa ciudad sang La Carlota.
Sa interview sang Bombo Radyo Bacolod kay Police Lt. Col. Arnel Solis, spokesperson sang Police Regional Office 6, nakaconduct na sila sang coordination meeting kaupod ang government agencies kag concerned units para sa hiwaton nga aktibidad sang presidente sa probinsya.
Suno diri, nakatutok ang kapulisan nga mapabilin nga malinong kag matawhay ang sitwasyon sa probinsya kag mahatagan sang proteksyon ang mga bisita.
Pahayag ni Solis, bisan diin man hiwaton ang pagbisita sang presidente, nakahanda ang kapulisan para magprovide sang security.
Mensahe sini sa mga supporters nga indi magtuga sang gamo kag sundon ang layi sang Commission on Elections.
