Wala na sang patigayunon nga muzzle taping sa mga personnel sang Negros Occidental Police Provincial Office (NOCPPO) subong nga paskwa kag bag-ong tuig.
Sa interview sang Bombo Radyo Bacolod kay Police Major Rhojn Darrel Nigos, public information officer sa NOCPPO, ginpaalinton na nila sa tanan nga mga police personnel nga ginadumilian ang pagpalupok sang armas luthang subong nga holiday season.
Pahanundom sini nga kun may-ara sang matukiban nga nagpalupok sang armas-luthang sa bag-ong tuig, sila ang mangatubang sang criminal kag administrative complaints.
Nagpatigayon naman ang mga ini sang accounting kag checking sang mga armas-luthang sang mga personnel kag ginmando na sa mga senior officers ukon commanders sa tagsa ka City ukon Municipal Police Station sa pagsupervise kag pagmonitor sang ila tagsa ka mga personnel.
Wala naman ginapahanugutan ang pagday off sa mga kapulisan, sa baylo apang nga sila ang yara lamang sa mga Provincial Police Office ukon sa ila unit, igadeploy ang mga ini sa mga barangay nga malapit sa ila tagsa ka panimalay agud maseguro ang kahilwayan sang kumunidad.
Ginapasalig sini sa mga pumuluyo nga ang mga personnel ang responsable sa paggamit sang ila mga armas-luthang.
Pahanumdom sini sa tanan nga law enforcers indi lamang sa mga kapulisan, nga magfocus sa pag-implementar sang law and order sa tagsa ka lokalidad.
Panawagan naman sini sa publiko nga saulugon ang paskwa kag bag-ong tuig nga masadya kag kumpleto ang mga tudlo.
