Nagpasalig ang Philippine National Police (PNP) nga mapabilin nila ang kalinong kag katawhay sa pagpatigayon sang Panaad sa Negros Festival 2019 nga nagsugod subong nga adlaw kag magatakop sa Abril 14.
Sa interview sang Bombo Radyo Bacolod kay Bacolod City Police Office (BCPO) acting director Police Colonel Henry Biñas, nagpadala na sila sang augmentation nga kapin 100 ka mga pulis sa sulod sang Panaad Park and Stadium bangud Negros Occidental Police Provincial Office (NOPPO) ang naga-supervise sa festival site.
Suno kay Biñas, magabantay lamang sila sa guwa sang festival site lakip na ang dalagan sang trapiko.
Ginpasiguro man sini nga standard operating procedure na nga ginadumili ang pagdala sang mga deadly weapon.
Samtang, ginkumpirmar naman ni NOPPO spokesperson Police Major Edison Garcia nga nagpadala man ang Police Regional Office-6 sang Regional Mobile Force Company bilang dugang nga pwersa.
Nagpasalig man si Garcia nga magabantay sila sang husto sa pito ka adlaw nga kahiwatan sa bulig man sang tagsa ka mga Local Government Units (LGUs).
