Padayon pa ang pursuit operation sang mga kapulisan sa ciudad sang Cadiz, Negros Occidental sa person of interest sa nasapwan nga 17 anyos nga bata nga babayi nga wala na sang kabuhi sa katubuhan sa Purok Masinolondon, Brgy. Magsaysay, Cadiz City, kahapon sang aga.
Sa interview sang Bombo Radyo Bacolod kay Police Major Bonifacio Aral, deputy chief of police sang Cadiz City Police Station, ulihi nga nakita nga buhi ang 17-anyos nga biktima kahapon, Enero 7 kag wala na ini nakapauli gani nagpangayo sang bulig ang iya pamilya sa mga barangay tanod para pangitaon ang biktima.
Padayon ang ila nga imbestigasyon sa pagkasapo sa 17 anyos nga bata nga babayi sa katubuhan nga wala na sang panapton samtang may yara naman sang laslas sa liog sini.
Suno kay Aral, padayon pa ang ila nga pagpangita sa panapton sang bata bangud indi nila makita sa crime scene.
Ang biktima ang ginreport nga nadula sang Enero 7 kag ini ang nasapwan kahapon sang aga, Enero 8.
Nakuha sa malapit sa lugar sang insidente ang isa ka tagub sang binangon nga ginapatihan ginapanag-iyahan sang suspek.
Ginpahayag sang deputy chief of police sang Cadiz City Police Station, nga may ginapangita nila sa karun ang amay sang step father sang bata bangud ini ang ginatudlo nga may kahimuan sa pagpatay sa biktima.
Suno kay Aral, wala sang kaupod sa balay ang biktima bangud ang iloy sini kag ang step-father ang nagatrabaho sa nagkalain-lain nga hacienda.
Suno diri, magkaingod balay lamang ang balay sang biktima kag ang ginatudlo nga suspek.
Ginpahayag man sang iloy sang biktima nga ang ginatudlo nga suspek ang nagasunod-sunod na sa 17 anyos kag ginapadul-ong ini sa eskwelahan antes pa man natabo ang krimen.
Desidido man ang iloy kag step-father sang biktima nga mapasakaan sang kaso ang ginatudlo nga suspetsado.
Sa karun padayon ang imbestigasyon sang Cadiz City Police Station sa nagluntad nga krimen kag ginaimbestigaran ang mga lugar kun sa diin mahimo magkadto ang ginatudlo nga suspek agud madakop kag mahatagan sang hustisya ang natabo sa biktima.
