Nagapahanumdom ang mga kapulisan sa San Enrique sa mga pamilya ukon grupo nga maga-outing sa mga baybay ukon suba nga bantayan gid ang mga kabataan.
Ini kasunod sang natabo nga pagkalumos sang 5 ka tuig nga bata sa swimming pool sang resort sa Barangay Poblacion, San Enrique.
Sa interview sang Bombo Radyo Bacolod kay Police Captain Rosinie Cabuena, deputy chief of Police sang San Enrique Municipal Police Station, karun weekend kag madamo ang extended ang bakasyon, ginalauman man ang pagdagsa sang mga pamilya ukon grupo nga maga-outing.
Pahanumdom sini nga kun magpaligo sa mga baybay, resort ukon suba, bantayan gid ang mga kabataan.
Madumduman nga ang napatay nga 5 anyos nga bata ang nagapaligo sa kiddie pool sang resort, apang wala sang may nakatalupangod nga ini ang nagsaylo na sa adult pool.
Samtang pahanumdom man sini nga likawan man ang magpaligo sa madalom nga tubig kun naka-inom sang makahulubog nga ilimnon.
Samtang kun indi naman malikawan ang mag-inom, dapat seguruhon sang mga magadrive nga sila ang makasarang pa sa pagbyahe agud malikawan ang mga disgrasya.
