Nagapadayon sa gihapon ang imbestigasyon sang Silay City Police Station angot sa kaso nga pagpatay sa 63 anyos nga inkargado sa Hacienda San Isidro, Brgy Bagtic, Silay City sang Byernes sang aga.
Ang biktima ang ginkilala nga si Ricardo Grullo, kasado, residente sang Hacienda Bias 1, Brgy Guimbalaon, Silay City.
Sa interview sang Bombo Radyo Bacolod kay Police Major Sarah Villanueva, Deputy Chief of Police sang Silay City Police Station, nagapadayon ang imbestigasyon kag may yara na sila sang ginalantaw nga persons of interest sa nagtiro-patay sa biktima.
Suno kay Villanueva, padayon man nga ginahibalo sang imbestigador sang Silay City Police Station kun pila ka persona ang nagtiro patay sa biktima kasubong man sa motibo sang krimen.
Madumduman nga nagdul-ong ang biktima sa iya manunudlo nga bata sa masakyan sini padulong sa eskwelahan kapin alas-6:30 tubtob alas-6:40 sang aga.
Apang sang siya ang papauli na, didto ini gintambangan kag ginluthang.
Ang motor sang biktima ang kaangay nga nagliko pa sa isa ka gamay nga dalan antes matumba, nga mahimo nga agud makapangayo sang bulig.
Narecover ang pito ka basiyo sang bala kag isa ka slug sa lugar kag kaangay nga gin-ubos gid ang isa ka magazine sang cal. 45 pistol.
Ang biktima ang nag-agom sang tatlo ka igo sang bala sa lawas nga ginalakipan sang duha sa tiyan kag isa sa abaga, kasubong man ang isa sa ulo nga naglapos sa iya helmet.
