Magadeploy sang 1,900 ka Police Personnel sa Western Visayas sa pagbantay sa mga lugar nga mahimo padulongan sang madamo nga tawo sa palaabuton nga UNDAS 2024.
Sa interview sang Bombo Radyo Bacolod kay Police Regional Office 6 spokesperson Police Lt. Col. Arnel Solis, kasunod sang Masskara Festival indi pa makapahuway ang mga kapulisan bangod sila ang magabantay naman sa mga vital areas sang tigkalalag.
Magluwas sa nagkalainlain nga mga sementeryo, kalakip man sa balantayan ang mga sea ports kag airports nga ginalauman nga madamo sang byahero partikular na sa Oktubre 31 tubtob Nobyembre 3.
Kasubong man sa simbahan, malls kag mga baligyaan sang bulak kag kandila nga mahimo dugukan sang mga tawo.
Magahamtang man sang Police assistance desk sa kada sementeryo nga pagabantayan sang duha pasaka nga police personnel.
Sila ang may mandato sa pagseguro sang kahilwayan sang mga magabisita sa minatay kag iban pa, agud malikawan ang mga insidente kaangay sang pagpangawat kag iskandalo.
Dugang naman nga hangkat sa kapulisan ang malain nga tiyempo.
