Hugot ang pagbantay sang kapulisan sa Bacolod City sa pagpatigayon sang Public Hearing para sa Visayas Power Crisis sang Department of Energy sa isa ka hotel sa Lacson Street, Bacolod City.
Ini kasunod sang pagprotesta sang pila ka grupo kaangay sang Bagong Alyansang Makabayan (BAYAN) sa gwa sang venue.
Sa interview sang Bombo Radyo Bacolod kay Police Lt Col Lester Leada, Deputy City Director for Administration sang Bacolod City Police Office, kabahin pa sa security measures sa pagbantay sa Masskara Festival 2026 ang ginhimo nga deployment sa ginpatigayon nga Public Hearing.
Suno diri, ginpreparahan nila sang security details ang event ilabi na nga madamo sang mga national officials kag mga kongresista nga nagtambong sa ginpatigayon nga inquiry in aid of legislation, agud masolusyunan ang power crisis sa Visayas.
Pahayag ni Leada nga wala sila sang napirmahan nga rally permit.
Panawagan sini sa ano man nga grupo nga kun luyag nila magpatigayon sang rally, magkuha gid sang permit sa Bacolod City Government kag ibutang kun sa diin nga lugar kag ano oras ang coverage sang pagprotesta agud indi masita-an sang mga otoridad.
