Ginkupirmar sang kapulisan nga minor issues lamang ang ila napangatubang sa Grand Opening sang Masskara Festival 2025 kagab-i.
Sa interview sang Bombo Radyo Bacolod kay Police Captain Rosalino Pugoy, station commander sang Bacolod Police Station 4, ang crowd estimate sa Bacolod City Government Center ang magadangat sa 63,000 kun ilakip ang mga yara sa palibot sang BCGC grounds kag carnival.
Samtang ginabanta 1,500 naman ang nagtambong sa Grand Opening sa Bacolod City Public Plaza.
Gin-athag sini nga sila ang nagbutang sang barikada agud makontrolar ang pagsulod sang mga tumalambong kag matsekyar ang mga dala sa pagsulod.
Aminado ini nga may pila lamang nga kabudlayan kaangay sang pagdinas-ukanay sang mga tumalan-aw sa barikada.
Subong man ang pagtsekyar sang mga yara na ngadaan sa sulod sang venue antes pa nila masirad-an.
Ginpasalamatan sini ang bulig sang mga force multipliers gani nahimo nga makontrolar ang sitwasyon.
Samtang wala naman sang may narecord nga nadula nga kabataan, apang may mga nadulaan sang cellphone kag wallet.
Apang ini ang indi pa makonsiderar nga kaso sang pickpocket ukon snatching bangod indi man segurado ang mga biktima kun paano nadula ang ila mga pagkabutang.
