Patay ang isa ka kargador sa Libertad Public Market matapos ginluthang kapin alas-3:30 kaina sang kaagahon.
Ang shooting incident ang nagluntad sa Mercedes Street, Barangay 40, Bacolod City, sa balaligyaan sang mga panakot sa Libertad Public Market.
Sa interview sang Bombo Radyo Bacolod kay Police Captain Rosalino Pugoy, station commander sang Bacolod Police Station 6, wala na sang kabuhi sang maabtan sang rescuer ang biktima, nga sa inisyal may-ara sang igo sang bala sa ulo.
Ang biktima, nga nakilala lamang nga si Alyas Alog ang nagakatulog sa folding bed sang ini ang gintiro-patay sang gina-alegar nakahelmet nga suspect.
Suno kay Pugoy, duha ka lupok ang nabatian sang mga residente, samtang wala naman sang nakasugid kun may motorsiklo ang suspect, apang ini ang nakita sang mga witness nga nakahelmet kag itom nga long sleeves.
Sa inisyal nga imbestigasyon sang kapulisan, natumod nga madamo sang kontra ang biktima, kag ini pa ang ila identify para sa dugang nga imbestigasyon.
Tsekyaron paman sini kun may record sang krimen sa estasyon ang biktima.
Ginalibot man nila ang mga CCTV sa area kun may-ara sang nakacapture sa suspect.
Sa karun, wala pa sang pamilya nga nagclaim sa bangkay sang biktima.
Ini ang ginabanta yara sa 5-foot-2 ukon 5-foot-3 ang kataason, mestizo, madamol ang kilay kag may mga tattoo sa butkon.
